Lenstiti Kiltir i lans son platform nimerik ek Bal Lasemenn

titi Nasyonal Pour Kiltir, Leritaz ek Lar in ofisyelman lans son platform nimerik, osi byen ki en nouvo leksperyans, Bal Lasemenn. Sa de linisyativ kiltirel i anliny avek zefor gouvernman pour promouvwar tourizm kiltirel, pour ankouraz bann viziter pour depans plis letan ki zot Sesel.

Dan seremoni ofisyel Merkedi swar kot Restoran Vye Marmit, Domaine de Val des Pres, Au Cap, Sekreter Permanan sa lenstitisyon, Cecile Kalebi, ti eksplike ki sa platform Seychelles Cultural Encounters i en pa signifikan dan zefor pour prezerv e promouvwar sa leritaz kiltirel tre ris ki Sesel i annan.

‘Tourizm kiltirel pa zis konsern demontre bann zoli peizaz e zoli lans; i osi enplik partaz lam nou nasyon – bann zistwar, bann tradisyon, e koutim ki defini nou konman pep Seselwa,” Madanm Kalebi ti dir.

Sa platform i enn ki dinamik, kot bann viziter, osi byen ki bann Seselwa i kapab dekouver e selebre kiltir, atraver bann leksperyans tel ki lanmizik ek ladans, bann vizit kot bann mize ek bann sit leritaz, manze Kreol ek bann lar artizanal.

‘Pour bann viziter, sa bann rankont i ofer en koneksyon pli o profon avek bann landrwa ki zot vizite. Zot aprann nou listwar, partisip dan nou bann festival, angaz avek kominite, e kree bann memwar ki lavi diran,” Madanm Kalebi ti azoute.

Lansman sa platform i osi marye avek manda sa lenstiti, ek son stratezi devlopman 2024-2028.

An plis, en nouvo aktivite kiltirel, Bal Lasemenn, ti osi lanse pandan sa seremoni. Sa aktivite ki pou fer tou le mwan, i enn bann fason met an valer bann ladans tradisyonnel Sesel.

Sa levennman pou fer kot Domaine de Val des Pres depi 6er ziska 10er diswar. Tiket pour sa levennman i 250 roupi pa personn, e pou anvant lo platform Seychelles Cultural Encounters.

Laura Pillay (Nation.sc)